أسهل طريقة لعمل الجبنة القريش فى البيت

مفيش أجمل من أنك تعملى كل حاجة بنفسك فى البيت

انا عملت الجبنة القريش على الحصيرة فى البيت هوريكم بالصور أزاى عملتها خطوة بخطوة

المقاديـــــــــر:-

1ك لبن حليب

رشة ملح

الطريقــــــــــــــة :-

هنحط كيلو اللبن بدون غلى فى حله معدن ونحطها بمكانى دافىء والاسرع ان نحطها بصنية فيها ماء دافىء من وقت للاخر ندفى الميه باننا نزود عليها ميه سخنه لحد ما يتجمد اللبن .

هدخله التلاجه عشان وش اللبن يتجمد وهو القشطه واعرف اشيله ان عايزة الجبنه مش دسمه لكن ممكن تقلبيه فى الجبنه بتكون دسمه حسب الرغبة .

انا طلعتها من التلاجة ونزعت القشطة وعندى حصيرة صغيرة اللى بتستخدم للاطباق الساخنه انا استخدمتها فى انى صفيت عليها اللبن من السرش بتاعه .

هفضى حلة اللبن الرايب على الحصيرة وارش الملح عليها حسب الرغبة والفها بهدوء لحد ما تصفى ميتها

لما تتجمد وتصفى الميه تمام هقطعها بالسكينه واشيلها فى طبق واحطها بالتلاجة .

والف صحة وهنا على قلوبكم طريقة سهلة وبسيطة وتقدرى تعمليها فى اى وقت وبابسط الامكانيات عندك ووفرى سعرها الغالى فى المحلات .

• هنا اللبن حطيته فى الحله وغطيت عليه وحطيت ميه دافية فى الصنيه عشان يروب بسرعة

• روبت اللبن وجمد

• نزعت وش القشطة من على اللبن

• الحصيرة غسلتها وجففتها جاهزة على الاستخدام

• فضيت اللبن على الحصيرة وحطيت ملح خفيف وقلبته كويس

• هنا لفيت الحصيرة برفق هشان تصفى المية ومن وقت لاخر بلفها تانى

• هما صفت المية وجاهزة على التقطيع

الف هنا وشفا على قلوبكم